Taman Geguritan "ULANGAN"


Ulangan

                                                                                                          
Dluwang mung daksawang
Siji mbaka siji ukara dakwaca
Nanging ora ana kang cumanthel ing pikir
Ora bisa mangerteni apa kang dadi kekarepane
Kuwur tanpa bisa mangsuli
angka kang mratelakake ajinining kapinteran
bakal sirna ing awang-awang
amarga sungkan tumandang nggegulang
kawruh kang dadi panuduh
marang dedalaning ngaurip
Rama ibu nyuwun pangapunten
Boten ngestoaken dhawuhe
mempeng sinau lan taberi
supaya dadi jalma kang sujana
getun ana mburi tan bisa dibaleni
kaya ngene ta menawa nglirwakake
piweling tiyang sepuh kang sabdane pancen ampuh

                                Dimuat PS No. 14 - 7 April 2018

Komentar

Posting Komentar

Postingan populer dari blog ini

Taman Geguritan "MANEKUNG"

Manekung Anggitan: Widyastuti Sang bagaskara wis sumunar Gumregaha nini Widadara bakal marak ing ngarsane Aweh palapuran marang hamurbeng rat Aja nganti katungkul Ayo manekung Supaya pikantuk Alam kanikmatan padununge sukma Tansah ngestokake dhawuhe gusti Bakal mukti mengkone Menawa kowe mbuja karepe dhewe Bakal getun tundhone (Kapacak ing PS No. 11 Tanggal 17 Maret 2018)
Baca selengkapnya

Taman Geguritan "ALAM DONYA"

Alam Donya Sunaring lampu madhangi dalan kang dakpecaki Pating gemebyar, kaya gumebyaring alam donya Donya kang kebak samudana, kebak lamis Kaya lamising omongane manungsa Kang ora bisa diugemi esuk dele sore tempe Cumloroting lampu mung saklerapan Kaya kedheping netra tanpa rinasa Nyecep banyu bebasan mampir ngombe Urip ing alam donya ora kena aji mumpung Kabeh dilakoni kanthi pikir kang wening Ati kang sareh tan kebak hawa napsu Tansah tumungkul suyud Ngestoake dhawuhing Gusti Amrih lila legawa lan tinampa Ing pangayunaning ingkang kuwasa Terbit: Djaka Lodang tanggal 20 Oktober 2018
Baca selengkapnya

Taman Geguritan "AKU"

Aku Anggitan: Widyastuti Aku pancen bocah embuh Nalika weruh wangunan kang ngemu Pasujarahan dijarah rayah atiku ora trima Nalika kabudayan kok singkang atiku runtik Aku pancen bocah embuh Nalika padha nerak aturan Aku bakal kojah Nalika padha seneng marang kang ora bener Aku bakal micara pener Aku pancen bocah embuh Nalika menangi kang ora trep ing ati Aku bakal ora sudi mituruti Nalika pranatan wis ora tumata Aku bakal opyak Dimuat Djaka Lodhang 12 Januari 2018
Baca selengkapnya